尋味小店 屯門吉氏

鍾意去餐廳小店，全因為小店總會帶俾你驚喜。嚟到屯門康景花園，喺眾多街坊美食小店之中，能夠吸引我哋嘅當然係餐廳嘅口碑同食物出品。吉氏由夫妻檔經營，由踏入門口開始，就能感受到阿吉同吉太嘅人情味，再聞到食物出品嘅香味，味絕對係吉氏嘅靈魂。

煙三文魚班尼迪
水波蛋係班尼迪嘅靈魂，而靈魂嘅精髓取決於生熟度。吉氏嘅半生熟水波蛋就恰到好處，用刀一切開，金黃色嘅蛋液就爭先恐後咁流出。微酸嘅荷蘭醬正好中和煙三文魚本身嘅鹹鮮味，再夾埋本身烤到脆身嘅英式鬆餅，令呢個醬演活咗一個恰如其分嘅大配角。

蘑菇意大利飯
意大利飯充分吸收咗蘑菇汁濃厚嘅味道，入口有嚼勁同時食到蘑菇汁嘅奶滑。而蘑菇嘅大小亦切到好配合送飯，兩者嘅口感都係軟硬適中。