通常同A姐去影相打卡都會係朝早嘅時候，但今次我哋就選擇夜晚，嚟到近期熱門，位於中環嘅己連拿利天橋。呢度錯綜複雜嘅天橋，加上旁邊嘅樹木，形成一條好似喺森林裏面嘅空中隧道，可以影到荒涼、暗黑嘅打卡靚相。
前往方法
經由大館旁邊斜路往上行，經高主教書院及香港聖母無原罪主教座堂旁嘅小山路行5分鐘，即到達己連拿利天橋
提提你
作為旅客嘅我哋記住要保持寧靜，唔好影響附近居民嘅生活呀
香港聖母無原罪主教座堂
第一代聖堂於1843年落成，但不幸因1859年嘅一場火災而焚燬。至1860年原地重建，並於1860年拆卸第二代聖堂。依家見到嘅係1883年動工，由位於倫敦嘅柯利和漢森公司設計嘅第三代聖堂。教堂以哥特式為設計風格，主要以花崗岩、磚同石頭建成，雖然經歷過第二次世界大戰嘅日佔時代，但好彩建築物無受到太大破壞。直至1946年，香港升格為教區，聖堂更變成主教座堂。依家評為一級歷史建築。
己連拿利天橋
天橋主要為附近嘅居民所用，但因為錯綜複雜嘅行車路、行車天橋、行人天橋同斜路，加上旁邊嘅樹木，而形成一個奇特嘅畫面，而成為大家打卡嘅熱點。
好多人都話呢度嘅天橋形成嘅線條結構，令人眼花瞭亂，形成錯視嘅感覺。當夜闌人靜嘅時候，更顯幽靜詭秘，充滿探險感，啱晒大家影暗黑同科幻感嘅相打卡啦！
