消防員係全世界最偉大嘅職業，沒有之一！做消防員可能係唔少男孩子嘅志願；而消防員嘅body就係A姐最想觸碰嘅區域。但想了解香港消防同救護嘅歷史或者有關消防員嘅訓練，就可以嚟到將軍澳嘅消防及救護教育中心暨博物館，呢度除咗有展板同短片介紹之外，更有多架已退疫嘅消防車、救護車，絕對係一個親子好去處。
前往方法
1.自駕遊：不設公眾車位，最近可以停泊附近嘅環保大道寵物公園停車場
2.乘坐港鐵至將軍澳站或坑口站，再轉乘前往消防及救護學院站之巴士
3.由於巴士班次比較疏，如果人多嘅話，不如乘坐的士
提提你
1.參觀前，必須經網上預約核實
2.英雄閣為紀念殉職消防員，故此請保持莊重及唔可以影相
消防及救護學院
位於將軍澳百勝角嘅消防及救護學院喺2016年啟用，佔地15萬8千平方米，係一座具有消防、救護及專門車輛駕駛訓練於一身嘅世界級消防及救護訓練學校。另設有消防及救護教育中心暨博物館等大家更了解香港消防歷史、運作同消防員培訓。
消防歷史沿革區
原來以前香港嘅消防服務係由警察兼任，但隨住香港發展，人口急升，而成立消防處，並喺各區設立消防局。另外，亦可以睇到由殖民地時期至今嘅消防處長嘅相片。
消防及救護車輛展覽區
平時喺街見到救護車同消防車，一定係有緊急事情發生，唔通叫佢停一停俾你影相咩？但喺消防及救護車輛展覽區，就放咗多部1:1嘅救護車同消防車，啱晒大家影吓相啦。不過，A姐對救護車完全無興趣（佢只對消防員有興趣），所以呢個區域多數都係男仔逗留最耐嘅地方。
消防服務展覽區
我哋一般最常見到嘅消防員工作，除咗救火同拯救困之外，其實仲有好多工作，例如包水浸、冧樹、車禍、被困等救援工作，仲有拯救小動物等等。
