太耐冇去過日本，令一眾思鄉病嘅香港人尋找港版日本風情畫。所以上次同A姐去完西貢北港屋場嘅竹林之後，深受大家歡迎，所以今次我哋走嚟到錦田嘅河背水塘，全程簡單而行，同樣有京都嵐山竹林feel，一於帶定相機，去轉輕輕鬆鬆嘅週末打卡旅行啦！
前往方法
1. 喺元朗或者錦上路站搭 71 小巴，尾站落車就係河背村。
2. 我哋就選擇自駕遊，車可以泊喺河背村外收費停車場，全日任泊HK$100；如果嫌貴，又唔怕行遠少少嘅，位於港鐵八鄉維修中心旁邊嘅滿記停車場，每小時收費HK$8。
提提你
1. 由河背村出發，路程約20分鐘就會到達河背水塘家樂徑門口，呢20分鐘路程以石屎斜路上山為主，唔算太辛苦，適合初級行山人士，但都要量力以為。
2. 河背水塘家樂徑為一個圓圈嘅路線，全程以平路為主，亦有樹陰遮擋太陽，輕鬆易行。如果不走回頭路，大概30分鐘行畢全程。
3. 沿路無洗手間，但設有香港青年協會有機農莊，農莊除咗售賣有機蔬果之外，亦有售賣冰菠蘿同飲品，但農莊係不定期開放，所以建議自備飲品。
4. 大家記住保持環境清潔，自己垃圾自己帶走，絕對唔可以破壞大自然環境。
大斜路
呢條大斜路係全程所謂最辛苦嘅一段，全程大概20分鐘，不過沿路景觀開揚，可以望到元朗錦田平原一帶。當見到河背水塘燒烤場之後，就會有指示提醒往右邊嘅河背水塘方向行。
河背水塘
河背水塘係香港面積最細嘅灌概水塘，水塘容量50萬立方米，水壩長157米，高17.4米，主要用途係灌溉新界西北嘅農田。河背水塘亦係香港少有嘅S形堤壩水塘，一邊係大壩，另一邊係水塘同小島，影出嚟嘅相好大對比，呃like一流！
