馳名秘製豬扒　尖沙咀華香園

海防道熟食中心係尖沙咀嘅平民飯堂，入面有大概10間大排檔選擇，除咗牛丸麵同餐蛋麵之外，入面仲有幾間大排檔標榜自己嘅豬扒遠近馳名，係海防道名物，但邊間先係最好味？我哋就喺海防道熟食中心幾間大排檔入面隨意揀咗華香園，試試佢哋嘅豬扒啦！

豬扒米粉
豬扒預先切件，味道都幾入味，鹹香十足，但略嫌油咗少少。反而米粉唔錯，夠滑又爽，加埋秘制辣椒油，味道大大提升。

豬扒雞中翼飯
至於雞翼炸得乾身，皮香肉嫩，又幾好味喎！白飯可以加埋枱面嘅甜豉油，就更加惹味。