今日A姐M佬要幫手照顧兩個小朋友，午餐就梗係唔可以求求其其，除咗要有營養，仲要夠好玩先得嘅！所以我哋就嚟到主打自己動手自己燒嘅鐵板燒：道頓堀御好燒專門店。道頓堀御好燒專門店除咗晚間放題又抵又多嘢食之外，近期仲推出咗期間限定，四款超得意嘅天竺鼠車車御好燒料理，可以自己設計成超得意嘅天竺鼠車車，夠晒得意又可以打卡呀！
Choco什錦御好燒
我哋第一個挑戰嘅天竺鼠車車御好燒料理就係Choco什錦御好燒，由於我哋大家都係第一次嘗試，所以店員都好細心講解烹調同設計嘅方法。呢個Choco什錦御好燒係嚟自動畫入面，爽朗又賢淑嘅天竺鼠車車：朱古力！Choco什錦御好燒入面有香腸同蝦仁，食嘅時候好有口感，加上味道濃郁，令人食指大動！
Potato薯仔沙律御好燒
2位小朋友同我哋講，呢個係天竺鼠車車嘅主角馬鈴薯呀！為咗唔想極受歡迎嘅主角變樣，所以我哋整嘅時候真係非常小心，盡量要將佢完美還原！好彩我都不負所望，大家可以打卡喇！呢個Potato薯仔沙律御好燒入面有好多薯仔，但重點係個沙律調味醬汁，唔會好溜，口感軟綿，非常開胃。
Shiromo煙肉生菜蕃茄班戟
好多小朋友都唔鍾意食蔬菜，但當蔬菜變成Shiromo煙肉生菜蕃茄班戟就大受歡迎喇！呢個Shiromo煙肉生菜蕃茄班戟靈感嚟自天竺鼠車車嘅西羅摩，佢最鍾意就係食生菜呀！呢個班戟入面爽脆嘅生菜同煙肉當然係口感嘅來源，而酸甜嘅蕃茄就令到大家都非常開胃，就連平時少食菜嘅小朋友都好快就清咗碟啦！
