曾經有旅遊網站做過一項調查，超過一半香港人嘅旅行篋入面總會帶定杯麵，我哋都唔例外。喺酒店房傾吓計，玩吓遊戲，最後一定要歎番個杯麵做宵夜，咁先叫做去旅行嘛！講到杯麵，喺橫濱大受歡迎嘅合味道紀念館就衝出日本，喺尖沙咀中港城開設分館，同樣設有多個見學工作坊同打卡點，啱晒大家嚟玩番一日啦！
提提你
1. 所有見學工作坊都有人數限制，並於一個月前接受預約，其中出前一丁工作坊係最受歡迎，所有假期、星期六及星期日嘅見學課程都會瞬間爆滿，所以記住提早預約喇
2. 喺工作坊製作嘅食物紀念品嘅食用有效期為一個月
合味道紀念館
因為戰後嘅日本實施糧食管制，所以安藤百福先生希望為受戰苦同災難嘅市民帶嚟簡單、溫飽及耐放嘅食物，所以喺1958年發明了全球第一個即食麵：雞湯拉麵。後嚟更成立日清食品株式會社，繼續業務，推出出前一丁、合味道杯麵等即食麵選擇，成為世界各地知名嘅品牌。至於近年落戶香港中港城嘅合味道紀念館，佔地接近10,000平方呎，更加係日本以外首個海外嘅紀念館。
打卡點1：杯麵牆
一入到嚟合味道紀念館就會見到一大幅杯麵牆，牆入面展示咗唔同國家嘅合味道杯麵。原來合味道會因應唔同地方嘅市場，推出唔同口味，好似香港就有香辣海鮮味、中國就有麻辣牛肉味、日本就有牛奶海鮮味、新加坡就有黑胡椒蟹味、泰國就有冬陰功味等等；而除咗有唔同嘅口味，仲有唔同嘅size，迎合唔同人士嘅需要。
打卡點2：大杯麵
除咗杯麵牆，另一個打卡點就係大杯麵喇！呢個高達3米嘅大杯麵，真係好誇張呀！但點解呢個杯麵會調轉放呢？原來就係為咗重現安藤百福先生研發杯麵時嘅逆向思維。
見學工作坊1：合味道杯麵工作坊
杯麵入面有好多配料，配料全部經過脫水處理，唔知你最鍾意又係邊款配料呢？喺呢個合味道杯麵工作坊，參加者可以揀選喜愛嘅湯底同4款配料，而我就特別鍾意杯麵入面嘅蛋，所以我就整咗一個全球唯一一個嘅香辣蛋杯麵喇！除咗揀選湯底同配料，我哋仲可以自行設計杯麵嘅杯身，創作獨一無二嘅全新品牌。之後就可以體驗逆向思維嘅麵餅倒轉入杯，再由導師放入配料、封杯以及封膠嘅程序，最後利用充氣袋將杯麵保護，咁就製作完成喇！
