潮州打冷一向俾人嘅感覺都係大排檔美食，深得唔少「麻甩」喜歡。不過，事情總有例外的！今日嚟到嘅和昌潮味館就係由嚟自潮州，超過65年餐飲經驗嘅高佬叔二代經營，佢哋一洗潮州大排檔嘅風格，改成以簡約木元素為設計重心，加上刺繡畫同古典色彩屏風攞設，實行打造高質嘅優雅脫俗潮州菜。
功夫茶
一坐低之後就會送下兩杯功夫茶，就好似歡迎我哋嘅welcome drink。
鵝三味
潮州滷水汁以醬油同多達二十種藥材同香料，日復日餚製，所以味道非常香濃，馥郁醇厚。呢個鵝三寶就有齊鎮店三寶：鵝肉、鵝肝、鵝腸。三款食物都勁入味，充滿濃濃嘅滷水純厚香味，齒甲留香。鵝肉嘅肉質非常嫩滑，食嘅時候一定要連埋皮一齊食，感受鵝油嘅香滑；至於鵝肝軟滑香濃，入口即溶，帶有甘香感覺；至於鵝腸爽口，勁入口，但就略嫌每條鵝腸都太長，食嘅時候會好論盡。
滷水牛面珠
牛肉採用澳洲穀飼牛，並以75度慢煮18小時而成，所以肉質非常嫩滑，肉味香濃。
潮汕煎蠔烙
講到食潮州嘢，我就最鍾意食蠔餅，呢個潮汕煎蠔烙嘅份量超多，食嘅時候好有口感！首先蛋邊非常香脆，用上鴨蛋包往肥厚嘅鮮甜蠔仔，真係啖啖都充滿蠔仔嘅滿足感。
