耗資約2億元，首個由政府興建嘅人工沙灘，位於大埔大尾督嘅龍尾泳灘，終於喺爭議聲中對外開放！沙灘全長約200米，背靠八仙嶺，面對吐露港，旁邊就係大美督同船灣淡水湖，環境真係幾靚！加上沙灘嘅設施齊全，除咗深得泳客喜歡，亦吸引咗海膽同水母（其實係人類出現咗喺佢哋居住嘅地方）。
前往方法
1. 自駕遊：設有70個私家車泊位，平日每半小時為HK$5，至於周末同假日則每半小時HK$20（真係好貴呀）！嫌貴嘅可以揸前少少，睇吓大美督咪錶有無位
2. 單車：好多人都鍾意踩單車入大尾督，所以呢度亦設有100個免費單車停泊位
3. 巴士：大埔墟港鐵站乘搭75K巴士，喺蘆慈田或龍尾村站落車
4. 小巴：大埔墟港鐵站乘搭20C小巴，喺蘆慈田或龍尾村站落車
龍尾泥灘
前身為龍尾泥灘嘅龍尾泳灘，曾經錄得超過400種海洋物種，係香港其中一個生態集中地。所以喺工程展開時，曾惹起極大嘅保育爭議。直至我哋嚟沙灘之前嘅一星期，更因為退潮而出現大量海膽同水母，除咗令唔少泳客受傷，更令沙灘嘅生態保育問題再次成為焦點！另外，沙灘兩邊設有百米長嘅護沙堤，堤外就係原有嘅紅樹林，更顯得沙灘格格不入！
龍尾泳灘
因為海膽同水母嘅出現（其實係人類出現咗喺佢哋居住嘅泥灘），所以沙灘設有唔少警告牌同廣播，提醒大家安全；而救護站亦設有急救用品，協助受海膽同水母刺傷嘅泳客。
