食海鮮你會去西貢？離島？流浮山定香港仔？但呢啲都滿足唔到為食又想打卡嘅我哋，因為今次我哋嚟到信記避風塘海鮮美食，呢度同一般嘅酒樓餐廳唔同，因為我哋要坐駁船去到銅鑼灣避風塘內嘅艇仔食飯，食真正嘅避風塘炒蟹，咁至係食得更尖、更地道同最夠風味！
如果想嚟信記避風塘海鮮美食打卡食飯，就要記住要預先book位，之後店主就會send whatsapp確認。信記主要提供海鮮套餐，當然你亦可以散叫自己想食嘅海鮮啦。我哋今日就叫咗個6人餐，再加多個炒飯啦！
秘製手撕雞
份量十足，除咗手撕雞，仲有雞腎同海哲，麻油香味十足，好開胃。
白灼基圍蝦
基圍蝦大大隻，肉質鮮甜結實，蝦頭仲有唔少膏㗎！
避風塘炒肉蟹
6人餐有2大隻肉蟹，蟹蓋有唔少膏，蟹肉鮮甜，加上避風塘炒法，令味道更有層次，非常惹味。肉蟹上面有大量炒蒜，炒到乾身，鹹香十足，非常脆口。
避風塘豉椒炒蜆
值得一讚係蜆肉大大粒，粒粒都開晒仲要全部無沙。豉椒炒法非常惹味，豉汁濃郁微辣，好好味。
白灼東風螺
毫無技巧嘅白灼煮法，更食到螺肉嘅鮮甜。螺肉份量唔少，廚師更細心將螺肉前嘅蓋預先剪走，令食嘅時候更加方便。
蒜蓉蒸蟶子王
新鮮又大隻嘅蟶子王，用蒜蓉清蒸就就好味，靠蒜蓉嘅香味就可以帶出蟶子嘅鮮甜味喇！講到好味，又點少得伴碟嘅粉絲呢？索晒蒜蓉同蟶子精華嘅粉絲，絕對係一大亮點。
灼油菜
食咗咁多海鮮，就食番碟油菜。油菜有光澤，口感爽脆。
