講起中菜，好多人可能諗「都係嗰啲嘢啦，都係炒吓菜、蒸吓魚啦」，但原來中菜都可以加入好多新元素，玩得出神入化。銅鑼灣新開嘅「顏府御膳」就主打新派高級點心中菜，由兩位大廚師傅設計多款玩味菜式，今次最令我印象深刻嘅，真係不得不提「麻辣脆皮燒賣」。
香港人必食 「麻辣脆皮燒賣」
要食呢道「麻辣脆皮燒賣」，就要喺朝早11點半至2點嘅點心午市嚟食喇。今次點心師傅一反傳統唔做蒸燒賣，而係做麻辣炸燒賣。精髓在於用麻辣料製成嘅燒賣外皮，炸脆後入口又脆又麻，後續再食到Juicy豬肉內餡。一粒燒賣就做到多種口感味道層次，可見師傅功架，更期待陸續上枱嘅點心。
「麻辣脆皮燒賣」由呢度嘅點心師傅創作，好有驚喜。
蝦餃皮都有驚喜 「紅椒汁露筍蝦餃」
燒賣過後，當然要有點心王之稱嘅蝦餃。呢道「紅椒汁露筍蝦餃」就用美國紅甜波椒製作蝦餃皮，一放入口有微微清新味，同平時淡而無味嘅蝦餃皮更有新鮮感，望落亦白裡透紅。
內餡用新鮮蝦肉同泰國嫩荀，彈牙蝦肉同清爽嫩荀兩種口感相互交替。
「酸菜魚湯鮮竹卷」 上湯都可以係主角！
呢度嘅鮮竹卷同樣係反傳統必食點心～平時食鮮竹卷都係浸一浸湯，令鮮竹卷食落Juicy啲。今次終於輪到上湯做主角喇！酸菜魚湯輕微酸辣，令鮮竹卷嘅腐皮吸入滿滿酸辣湯，一口咬開鮮竹卷即爆湯。腐皮又有嚼勁，邊食邊滲出酸辣味，加埋豬肉、雲耳等內餡極豐富。
鮮竹卷擺盤精緻，打卡able！
「牛油果長腳蟹春卷」 春卷都有阿拉斯加長腳蟹！
「顏府御膳」環境高級典雅，所以一入門口已期待食到靚食材，只係估唔到喺點心階段就出現！香炸春卷包住嘅係阿拉斯加長腳蟹，蟹味鮮甜香濃不在話下，師傅巧妙加埋牛油果解膩更係一絕。
食春卷都食到阿拉斯加長腳蟹肉。
呢度環境典雅，坐低飲杯熱茶心境都平靜唔少。
仲有VIP房有隱私度。
新加坡風味 「新加坡黑胡椒粉絲蟹煲」
午市同晚市都有小菜食，傳統小菜亦加入唔少新元素。呢道蟹煲就用上原粒黑胡椒、白胡椒同金不換炒香，辣得快、辣得香但又唔會好嗆，用嚟襯大蟹啱晒。
大蟹多肉鮮甜，用微辣胡椒吊味好夾。
蟹底粉絲吸滿蟹肉鮮甜精華，撈埋少少蒜香、胡椒食勁香口。
中西Fusion 「慢煮牛肋排」
估唔到中菜廳都會食到牛肋排，呢道牛可以話係融入中西煮法，用上中式材料同西式慢煮方法，令牛肋排味道層次豐富又軟腍。大廚透露佢哋將上等美國安格斯牛肋排用香葉、白胡椒、花椒、八角、炸香乾蔥等醃香，再用頭抽同燒肉汁慢煮10個鐘先有呢個效果㗎。
慢煮煮法，令牛肋排肉質特別軟腍。
限量版＋特別版茅台酒牆 靜待知音人
食牛當然要配酒，嚟梗晚市仲有紅酒Chateau Bellevue 2016 買一送一優惠，可以盡情飲多兩杯。其實東主亦係愛酒之人，所以除咗有紅、白、啤酒揀外，仲特別有茅台酒𠻹！店內仲有一整排茅台酒牆相當搶眼，如果睇啱都可以即場買特別版茅台㗎！
店內茅台酒牆好搶眼。
糯米飯吸滿蟶子精華 「蟶子皇櫻花蝦蒜香糯米飯」
冬天一定要食糯米飯暖吓胃，配料用鹹香微甜日本櫻花蝦、櫻花蝦醬代替傳統臘味，加埋蒜茸、蒸熟糯米飯一齊炒香。
精華之處，係最後將炒香嘅糯米飯鋪上蘇格蘭蟶子皇蒸多3分鐘，令糯米飯吸滿蟶子皇嘅鮮甜味。
糯米飯鋪上蟶子皇蒸，每粒飯都滲透蟶子精華。
* 資料由客戶提供
