【同學各位 找個位 都係要先食好西】

17

【同學各位 找個位 都係要先食好西】
唉…唔經唔覺暑假已經就黎完喇。趁著呢幾日好西專員決定去捉著夏天嘅尾巴,黎呢間街景一流,自然取光嘅Urban Park high返個tea。
個tea就係一個半掩嘅雀籠,上層放嘅係鹹點,其中巴馬火腿芝士卷係入面最出眾嘅一樣,本身用紙卷包著,睇黎就以為係普通嘅芝士火腿三文治,估唔到入面嘅巴馬火腿有鹹香得黎又唔會過鹹,同芝士相輔相成,而且佢仲有層pancake咁包住,提升左個口感,為呢個鹹點錦上添花。意大利腸多士同煙三文魚多士就不過不失,多士鬆脆合適,冇咩特別。而最後就到shrimp cocktail,個汁比起平時嘅雞尾汁淡色,但又唔會好淡口,酸酸辣辣兼粒粒爽口,而蝦都幾大隻同爽口,值得一試架,但係如果本身唔太鍾意青椒既好西人可能就未必咁鍾意。
而甜點方面,專員最中意個士多啤梨吉士撻,士多啤梨唔酸,個吉士打得夠滑,咁實冇死喇!馬卡龍味道可以,個樣就唔太討好。可能打漿個陣打得唔夠滑,焗出黎個表面有少少裂同唔平滑。其他幾樣甜點專員覺得麻麻,可取嘅係唔會甜到滯。
今次埋單大約加一後$24x for two,專員覺得價錢實惠,值得一試。

在指數:
好味道:4/5
好樣度:4/5
抵食度:4/5
仙氣度:4/5